Inagurasyon ng Regional Science Centrum sa Marinduque State College (MSC) sa Boac, Marinduque
Pinasinayaan na ng Department of Science and Technology (DOST) -MIMAROPA, sa pakikipagtulungan ng Pamahalaang Panlalawigan ng Marinduque, Office of the House Representative of Marinduque, at ng Marinduque State College (MSC), ang kauna-unahang MIMAROPA Regional Science Centrum sa noong ika—18 ng Abril ngayong taon.
Ginanap ito sa MSC kung saan nakalagak ang Science Centrum na mayroong 35 interactive exhibits na nagpapakita ng iba’t-ibang konseptong pang-agham. Pinangunahan ni Dr. Diosdado P. Zulueta, Presidente ng MSC, ang nasabing inagurasyon. Aniya, nagkakaisa ang DOST, pamahalaan sa lalawigan ng Marinduque, at ang sektor ng akademya upang iangat ang kamalayan ng mga mag-aaral sa MIMAROPA sa pamamagitan ng infrastructure development program tulad ng pagpapatayo ng Science Centrum. “Kaya po talagang napakainam na ang DOST, local government, at nang ating congressman, ay talagang nagkakaisa, at siyempre sumusunod tayo sa akademya, sapagkat sila talaga ang makatutulong sa atin, para palaguin ang Marinduque.”
Ayon naman kay Dr. Ma. Josefina P. Abilay, Regional Director ng DOST-MIMAROPA, isa sa mga nakikita nilang hamon sa kanilang rehiyon ay ang kakulangan ng oportunidad na maranasan ng mga kababayan nito ang ganda at hiwagang hatid ng siyensya sa pamamagitan ng mga exhibits. Dagdag pa niya, halos dalawang dekada na ang lumipas nang huling bumisita ang Sci Fun Caravan Science Centrum sa lalawigan pero kanya pa ring naaalala kung papaano tinangkilik ng mga estudyante at guro ang mga exhibits na dala nito. “This shows that science facilities like the science centrum can help increase the appreciation and understanding of science, technology, and innovation among the general population.”
(From left to right) Dr. Ma. Josefina P. Abilay of DOST-MIMAROPA and Dr. Diosdado P. Zulueta of MSC
Binanggit naman ni House Speaker at Congressman ng Marinduque Lord Allan Jay Velasco na titingkad ang interes ng kabataan sa siyensya, matematika, teknolohiya, at iba pang kapaki-pakinabang na paksa dahil dito sa Science Centrum.“Naniniwala po ako na kung mas maraming mga kabataan ang magiging interesado at piliing tahakin ang pag aaral ng mga ito, mas marami ang magiging oportunidad na magbubukas para sa kanila.”
(From left to right) House Speaker Lord Allan Jay Velasco and Governor Presbitero Velasco Jr.
Binigyang diin naman ni Marinduque Governor Presbitero Velasco Jr. na kasama na ang Regional Science Centrum sa ipinagmamalaki bilang kauna-unahan at natatanging science exhibit sa MIMAROPA. “Maganda po na we take pride in Marinduque, marami tayong mga distinctive na reputation like— we are the heart of the Philippines, we are one of the very few provinces which is a drug clean and has one of the lowest crime rate in the country. And second safest province in the Philippines. Other than that, we are also known as the butterfly capital of the Philippines. Ngayon naman, we take pride in saying na we now have the only Regional Science Centrum in MIMAROPA.”
Kaugnay ng nasabing pagpapasinaya, inihayag naman ni DOST Secretary Fortunato T. de la Pena ang kahalagahan ng pagkakaroon ng mga science exhibits dahil tinutulungan nito na mas maintindihan ng madla ang mga komplikadong konsepto ng siyensya. Dagdag pa nya, hindi lang ang grupo ng mga kabataan ang matutulungaan nito kundi pati ang mga matatanda na mababa ang interes sa larangan ng agham.
“So kung sino man ang walang hilig sa science, pero kapag nakakakita sila ng interactive exhibits, naeexcite sila at maaaring maging curious pa sila sa science and technology. Pero ako naniniwala po ako, dahil ang level ng science interest dito sa PIlipinas among adults is very low, pupwede rin siya (Science Centrum) pakinabangan”
Ribbon cutting ceremony and unveiling of marker ng Regional Science Centrum
Nagkaroon ng ribbon cutting ceremony at unveiling ng Regional Science Centrum marker na pinangunahan nila DOST Secretary Fortunato T. de la Pena, DOST-MIMAROPA Regional Director Ma. Josefina P. Abilay, MSC President Diosdado P. Zulueta, Marinduque Governor Presbitero J. Velasco Jr., at ni House Speaker Lord Allan Jay Velasco.
Ribbon cutting ceremony and unveiling of marker ng Regional Science Centrum
Isa sa mga exhibits na matatagpuan sa Regional Science Centrum ay ang “Dancing Worm” kung saan ipinapaliwanag kung papaano gumagana ang magnetic fields. Isa rin sa mga exhibits ang “Watch me pedal” kung saan ipinapakita ang mekanismo ng ating mga buto at kasukasuan kapag tayo ay gumagalaw. Ang lahat ng exhibits ay na-curate sa tulong ng Philippine Foundation of Science and Technology (PFST).
(from left to right) DOST Secretary Fortunato T. de la Pena, DOST-MIMAROPA Regional Director Dr. Ma. Josefina P. Abilay, DOST-STII Director Richard P. Burgos, and DOST-DLLO Director Lita S. Suerte
Kasama rin sa mga exhibits sa naturang Science Centrum ay ang dalawang unit ng DOST developed Science and Technology Academic and Research-Based Openly Operated Kiosk Stations (STARBOOKS) na makakapag bigay ng libu-libong digitalized science and technology resources na maaaring ma-access kahit walang koneksyon sa internet.
Sa ngayon ay nakatakda na ang pagbubukas ng Regional Science Centrum para sa mga mamamayan maging sa mga turista ng Marinduque at rehiyon ng MIMAROPA. Kaakibat din sa proyektong ito ang Department of Education- Marinduque upang maihatid ito sa mga guro at estudyante sa lalawigan.